Ka Hookipa Alii
The Royal Reception
This article honors the Kahu Aupuni (caretaker of the government) during King Kalakaua’s 1881 world tour. The Kahu Aupuni at this time was Princess Liliuokalani, who later became Queen of Hawaii. She is identified in the article by her genealogical chiefly name, Kamakaeha..
Bettmann/Getty Images
Tip: Click on any Hawaiian paragraph to reveal its English translation.
KA HOOKIPA ALII
Ma ka Poakolu o ka pule i hala, ua malama ia he anaina nui maloko o ke keena nui o Aliiolani Hale, no ka malama ia ana o ka ike Alii mua loa a ko kakou Kahu Aupuni. Ua akoakoa ae na Komisina a me na Kanikela o na Aupuni e, a me na maka hanohano o ke kulananakauhale nei no lakou i haawi ana aku i na hoomaikai i ka Moi kuikawa o Hawaii.
Ua ukali ia ke Kahu Aupuni e kahi mau alii nui o ka aina, a ua hoike mai na mea a pau i ka nani a me ka oluolu o ka noho ana o ka aina a me ke aupuni. Ua olelo ia, o keia kekahi o na hookipa Alii i ike ia ai ka ulumahiehie o na mea a pau, e hoike ana i ke kilakila a me ka nani o ke alo Alii o Hawaii.
KO KAKOU KAHU AUPUNI
Ua kaulana loa o Hawaii nei i na la i hala e aku la, no na hookele ana a kona mau Makua Aliiwahine ma na mea pili ka hooponopono aupuni a me ka malama ana i ka lahui; a aole no hoi oia wale, aka, he pomaikai nui nona ka loaa ana o na Aliiwahine i piha me na noonoo moakaka maikai.
Ua kaulana i ua aloha ia me na hoomanao pipili paa, ka inoa o na Aliiwahine Kaahumanu, Kinau, Kekauluohi a me Kamamalu, a me kahi mau aliiwahine e ae no. A oiai i ka hoea ana mai i keia au hou, ke au hoi o Hawaii i haakohi ia ai a hanau iloko o na poai ano hou a okoa loa mai ko kela aku la, he mea lana pono a oluolu o ka manao ka hoomaopopo ana, oiai ka Makua Alii ka Moi o ko kakou aupuni ma na aina e.
E imi ana a e huli ana i na kumu ike a me na haawina hoonauao no ka pomaikai o kakou a pau, ua waiho iho ia i ka hoeuli o ko kakou waa aupuni iloko o na lima o kekahi o na Aliiwahine i lawa piha a i kohu pono e hoonani i na makalua i hoopiha mua ia e Kaahumanu, Kinau, Kekauluohi a me kahi mau alii e ae i hele e i ka po.
He oiaio, he au hou keia, a he au i oi aku na pukoa a me na lae ae e uhi paa ia nei e ka moana o ke au o ka manawa mamua, o na la i noho hookele ia e kela mau aliiwahine aku la; aka, ua ike ia, a ua hooia ia, a ua paa ka manaolana hopohopo ole o ka lahui, aia he alakai i lawa me ka makaukau nana e hookele ia Hawaii a kaalo ae ia mau pukon a me na lae na.
A e hoolulu mau o Hawaii maluna o ka moana lana malie; a aia ma keia mua aku, e ike ia no maloko o ka poai lei hanohano nana e hoonani a e hookilakila i kona kulana, mawaena o na inoa o na Aliiwahine Makua o Hawaii, ka hopuna inoa kamahao KAMAKAEIA.
Comments(1)
Mahalo!
